Harapan Orang Tatua

 Panjang carita kalo bicara cinta

Milenial dong labe padis dari cili padi

Banya cara dong ungkapkan ekspresi

Kadang batul, kadang jua salah

Jang paparipi par mau kaweng muda

Barmaeng rumah kacil labe indah dari rumah tangga

Nikmati kasi puas ale pu masa muda

Supaya satu saat ale bisa jadi inspirasi par generasi muda

Banya yang main murah meriah

Butuh 1 jempol deng bage-bage postingan,

Itu hati pung bahagia apa jua

Dong nekad kasi kalah para penyanyi Dangdut era 2000an

Nona manis hati jantong pisang abu-abu ee

Jang talalu sensasi su lia baabu

Biar ale muka manis kaya tebu

Tapi kasiang ale su macam dabu-dabu

Yang 1minggu su basi jadi akang bobou

Ale dong kira dunia skarang itu sanang

Lalu ale dong cuma pikir aman

Lalu mulai bikin aksi par cari tenar

su lia macam atlet yang bikin samua gaya renang

Lipstik tabal, hp mahal,

badan bagatal su labe jahat dari ular gatal,,

Tapi parcaya diri paleng kantal

Sedangkan orang tua malu sampe bale manyasal

Nona manis hati pisang tongka langit e

Bikin aksi tu par bawa nama Upu Lanite

Karna Antua pung janji  abis hujan ada pelangi

Bukan bikin aksi par bikin malu keluarga deng diri sendiri

Ingatan dunia skarang su susah

Masi muda jaga diri bae-bae jua

karna manyasal seng datang di muka

Kalo su salah, minta ampong dari ale pu ina ama

Balas orang tatua pung aer mata deng karingat

Bikin bae tampa garang itu dolo

Parcaya samua jalan pasti tabuka

Ambon, 4 Mei 2020

Vigel Faubun,S.Pd