Ucapan Natal dari Gandong Muslim ke Gandong Sarane

Dolo katong pernah ancor

Ancor sampe rumah-rumah Adat bocor

Tugu-tugu perjanjian Adat biar su cor

Tapi keadaan yang bikin molor

Natal deng Idul Fitri pernah dalam derita

Tapi sakarang samua tinggal carita

Generasi Maluku bangkit bawa berita

Cahaya dari timur jadi saksi sejarah

Pela gandong badiri bangun Maluku

Salam sarane mulai kombali jadi satu

Perbedaan bikin sadar par menyatu

Samua sadar karna samua satu suku

Sakarang akang pung saat katong maju

lupakan samua yang pernah rusuh

jang gulung tangan baju

par sudara sandiri katong mau unju biji ruku

Par Damai katong dendangkan ayat alqur'an

Par Damai katong dendangkan ayat Alkitab

Nyayian kapata bikin generasi ambil sikap

Cinta deng sayang mulai bertaburan

Sakarang Natal su datang

Lahirnya Yesus di tandai deng bintang

Juruslamat yang lahir di kandang

Itu basudara sarane dong parcaya akang

Katong Maluku pake rasa

Kumpulan generasi-generasi luar biasa

Akan bersatu par Maluku pung nama tetap di angkasa

Mari terbentuk dan bersatu bukan par mau merekayasa

Dengarlah katong pung Assalam walaikum

Katong percaya pasti sudara gandong bisa rangkum

Balas salam sejahtra di akhiri dengan kata Syalom

Selaku orang basudara

Beta sal'am yang karna katong samua satu dara

Mau bilang salamat Natal Par basudara Sarane

Semoga Dame Natal salalu ada dalam hati.

Parcaya Upu Lanite akan merestui

Katong sama-sama akan lalui

Perjuangan par bikin Maluku manis kombali

By : Vigel Faubun,S.Pd

Komunitas Kalesang Maluku