Mana Ale Pung Maluku

 Kalo tau jati diri

Ana Adat seng di bodohi

Kalo tau jati diri

Katong harus perjuangkan harga diri

Kalo tau jati diri

Mari bataria Hak Asasi

Samua bisa bicara

Asal batul kalo pu posisi

Ini seng gampang

Tapi ini titipan

Maluku ini di perjuangkan deng nyawa

Bahkan terjadinya tumpah darah

Bukan cuma carita belaka

Par di bukukan dalam sejarah

Kalo tau jati diri

Tanah Adat seng mungkin di perdagangkan

Kalo tau jati diri

Adat seng mungkin di campakan

Maluku skarang balom bersatu

Samua bicara iko mau

Demi kepentingan semata

Di korbankannya tanah putus pusa

Mana ale pu Maluku,,?

Mana itu anai alifuru,,?

Mau lia negeri ganti desa

Karna uang tutu mata,,?

Bicara adat par kepentingan

Asal kantong dapa uang

Seng pastiu titipan orang tatua

Yang penting jual samua yang ada

Ya sio kasiang

Moyang-moyang dudu manangis

Ana Adat seng rasa perjuangan tragis

Labe suka kabualang

Labe labe ikang makan ikang

Hidop kapiting tu pi buang jau

Par kasi maju tanah Air Maluku

Jang satu kasi jatu satu

Mari katong keku jang katong kuku

Para-para dari bambu

Itu bikin sampe orang tatua menyatu

Asal par dudu bicara strategi

Biar cuma deng pakian lusu

Mana ale pu Maluku,,?

Mana Anai Alifuru,,?

Balom ada kata terlambat

Jang bikin lalu menghambat

Kalo ale tau jati diri

Sampe biar katong mati

Harus inga dalam diri

Janji moyang-moyang itu harus di tepati

Inga Pattimura tua su mati

Tapi akan bangkit Pattimura muda

Yang siap berjuang sampe mati

Par Tanah Maluku yang katong cinta

Skarang ini yang muda sisa katong

Kalo seng bersatu generasi baru ilang jalan

Bisa tabaos salah tampa

Lalu mau kasi salah sapa

Mana ale pu Maluku

Mana Anai Allifuru

Jang cuma dudu takisu

La tarkira orang nomor satu

Akhirnya bikin Maluku seng maju-maju

by : Vigel Faubun