Apa Tempo

 kalo katong bicara tentang Maluku

negeri yang kaya paling tinggi rasa malu
generasi paling biji ruku
sayangnya hidup baku kuku

bicara topu dada paleng jago
bikin diri kaya tim tanggo
padahal suka bikin aksi mongo-mongo
cili kata halia sama-sama bado

awas Lumbung Ikan Nasional
tutupi harta Masela yang sensasional
gadai Maluku par dunia Internasional
karna talalu kuat deng hidop sosial

negeri yang manis su mulai ada konspirasi
masyarakat adat hilang hak asasi
niat par tukar sagu deng nasi
masyarakat dapa tekan ujung-ujungnya musti kasi

baeleo ganti deng rumah rakyat
karna samua tunduk pada ayat-ayat
peraturan seng berpihak pada masyarakat
itulah Maluku pung kisah yang akhirnya jadi riwayat

dimana para wakil rakyat jelata
apa dong pura-pura tutu mata
atau kursi empuk bikin seng mampu par berkata-kata
sampe musti ada luka dan derita

awas lenso putih katong badiri kipas
saat penguasa datang kasi gula-gula tapi niat par rampas
harta Maluku terus dapa kupas
masyarakat Maluku laste ampas

sio sayang la dilale
apa tempo Maluku jaya lai kombale
aer mata jatu malele
katong cuma bisa lia tapi seng bisa pele

By : Vigel Faubun,S.Pd